الشاعر جلول بن يعيش
إيلا كملت لا تحشمو قولو معيار …… لكلام الزين مالقيتو يجبر لكسير
ماهي قصة جيت نحكيها يا حضار……هادا واقع يااخواني خصو تغييرمثلتو قط جا يصيد احمام اوطار …… اجهل او قال يا الخالق تحرمني طير
اقبيض احمام خير ليا من ألف فار … لحم لحمام فيه بنة والفار امرير
كم من قايل في كلامك راني محتار… وحدا وحدا يا مقلق هاك التفسير
ابدا بمرا فالزناقي رفعت شيعار ….. تتظاهر بيه قالت أنا بيت التحرير
أعلاش انايا أحبيسة ديما فالدار… حبيت أنكون كي الراجل نخدم واندير
هاد الحجاب ما يساعد في ركوب الكار … لازم ليا باش نخرج نلبس لقصير
ثاني شعري راه غامي تحت الخيمار…. نصحك اصواب يا طبيبي انقلعو خير
ما عرفت قاع منين جبتي هاد الأعذار…. اجنود ابليس ما يبدعو هاد التبرير
يا اختي نو صيك لا تبعي درب الفجار… كيف النعجة جرات للديس تحساب اشعير
التحضر ما يردو حايك واعجا … والتخلف ماه ضدو تقليد الغير
خلي لمرا ياك ربي وصا بالجار... أرواح تشوف جورة اليوم كيفاش اتدير
تلقاه يقيس فم دارك زبلة واحجار … ولا قلت أعلاه قال غزيت واشكي للمير
طغاه المال شان طبعو ولا حقار …. وانسى ماشاف من امحاين كي كان أفقير
يا صاحب هاه لا تصاحب من هو مكار… لا بيت أنقاك لا تجالس نفاخ الكير
غدوا لا فرغوا جيابك يصبح نكار… يتشفى فيك ما يشفو حالك لعسير
بلاك تقول لو صحيبي راني مضرار... خفف اعلي اهمومي خويا لعشير
لا جاد يروح للجمايع يفضح لسرار... يمن اعليك ما اعطا لك وتعاف الخير
اعمى لقلوب أش جابو لعمى لبصار… من قلبو حي دون عينين تلقاه ابصير
ربي نقي لي قليبي من كل أكدار….. وقلوب السامعين كامل واشفي الضرير
اللهم اصلي على نبينا ساطع لنوار…. بعداد انجوم واكواكب من دون أحصير
واعداد اقطور السحايب واعداد أزهار… واعداد اللي بكرش زاحف وارجل يسير
واعداد الحوت لمشتت في كل ابحار…. واعداد ارمال فالصحاري ومن ليه أزفير
واعلى آله واصحابو دوك الأبرار … علي عثمان بوبكر وغيرهم اكثير
مهاجرين في دعوتو معا الأنصار… والتابعين كل واحد اجزاه اوفير
جلول بن يعيش ناظم هاد الأشعار … أغفر لو يالله ذنبو اوقيه اعثير
واغفر للمومنين كامل أيا غفار…. جود أعلينا يا الواحد بحساب ايسير
واسترنا من اعيوب فينا أيا ستار…. وارحم لموات فالمدينة بجاه البشير
...منقول ارجو يعجـــبكم ...
