جوه ضلوعي طيور وبتحب الغنا
.. والزقزقة
أنا نفسي ارقص مرتين
واخرج من الأود
اللي لسه ضيقة
رقص يخطي ع البحور والأفدنة
رقص يصب بهجة
.. ف ايام السنة
لكني فعلا بانكسف
باخجل
واداري نزوتي
.. فيك يا ورق
ياللي نزعت سري مني
خليته علن
واديني بادفع التمن
أدخل في شرنقتي اللي قد البندقة
ولما يفيض بيّ
أرجع واعترف:
جوه ضلوعي طيور
وبتحب الغنا
والزقزقة !
زقاق قديم
بلاط مربع في الزقاق
وبيت بيتسّـند على كتف الزمن
لما باخطي
قلبي والله يرتجف
هنا حَبيت وبكيت هنا
حبّـيت وما كرهتش في يوم
" عبده " الحسودي دكانه ماعادشي ليه أثر
وده كان يبص البصة
.. يجروا يبخروا
.. بعد ما ياخدوا من كمه أثر !
شباك ، ومفتوح من سنين
لا عاد على المنشر هدوم
.. ولا كلام
بافوت وبارمي ع الحيطان
بالإيد سلام
أشعر بإني أنتمي لعالم قديم
مليان دفا كله حنين
لكن الفؤاد اللي سكن
والضحك اللي يمر في عباية الزمن
ليه بيخايلني بالاشتياق
بلاط مربع في الزقاق .
مطر
