في حيطة خاطر الذكرى الحي
في حيطة خاطر الذكرى الحي
شافعة أحلامي المهووسة
شخبطت الخوف بي قلم الضي
هبشت آلامي المدسوسة
و رسمت على ضفة نيل واحد
أطلال الخلة البنكوسا
ونشلت في غفلة خلافاتنا
و الفتنة الغدارة بسوسا....
ما القسمة القسمت قسمتنا
وقلوبنا المن نفس المعدن
واللحظة البملاها حضورك
وبنات الذكرى المابنسن
والضل الرامي على الساعات
لحظاتنا البي طيفك إنسن
والدمعة الساقية خدود عاشقك
من مجرى العين بالكف والدن
صاينين ميثاق العهد البين
عيني وعي*-تم الحذف. كلمة غير محترمة لا يسمح بها في هذا المنتدى-* الدرسن
نيلين في الود قلبي وقلبك
(أبيض و أزرق)
لا بد يتوحدو في مقرن
والفتنة البيناتنا ندوسا....
أطيافك ما أحلى وشوشا
بطراك في كل العشتو معاك
فرع اللبلاب البيتاوق من سقفة حوشنا المعروشة
و يتصنط ونسات الشارع منقولا صحيحا ومغشوشا
في الصحن الممدود بالحيطة
والجارة المن يوما بشوشا
و في العتبة الرامية ظلال الحب
وخريطة الماضي المنقوشة
في الصوت الحالف (نبنيهو)
وفي قصة (ميري وعيوشة)
و في الكوز الكشح موية البين
والدق نحاس المنحوسة...
يا مسافر من بلدك ومارق لي بلدك بعدنا ما حيدوم
ماليني دليبك والتمتم وجراري ونقارة و مردوم
يشهدو سوميتنا وودعاتنا و*-تم الحذف. كلمة غير محترمة لا يسمح بها في هذا المنتدى-*كنا الفوق الجيد منضوم
ووحاة الشادي (جدودنا زمان) والقلم الخط (حلم مقسوم)
والصوت الغنا عليك طربان( يا مسافر قوم سيب الخرطوم)
راجعين ما دام أشجار الحن في طينتي وطينتك مغروسة....؛؛
راجعين يا خي راجعين والله
أنفاسك في قولة اتفضل والعيد الجانا بهيج طلة
في الغيم الشايل من جيهتك والسيل الزاد الطين بلة
في الحلم الكل ما ليو بكبر لا بقل لا عنك بتخلا
في النيم والنخلة وفي عينين شافعة أحلامي المهووسة
الشخبطت الخوف بي قلم الضي
هبشت آلامنا المدسوسة
و رسمت على ضفة نيل واحد
نخلة و لبلابة و أبنوسة
اتشابكو فوق طينة العزة
و اتكاملو بالحن نادوسا....
. 
