أحسه عله البعد يتناكل اجدام.............يزامط بالجذب من يمشي يكزل
يهيم عله العشك ياربعي محتام...........مكسور الجنح ماطار ويهنجل
اهيده ومايفيد وياه مرهام.................المخلبص خيوطه شلون يغزل
نسه وماتاب من ضنكات الايام..........ولاذيج الليالي البدمع يهمل
اصيح اركد يجرحك توه ملتام...........ولا وياه ماظن الحجي يرسمل
نصح مافاد لاينفعله مضمام.............وكح كلبي يصاحب من يشوف الخل
صرت مثل الوكع وصوابه بالهام.......جن هذا النفس مايصعد وينزل
يكلي عله العشك متحزم احزام..........فرض واجب علينه ننثر ونشتل
يوجهه تكول جنه مرايه من جام.........يوسف صورته وبالحسن يرتل
ملك حسنه ويكلنه نصير خدام...........خو تدري العمر وبلا هوه يفشل
عليه عيون ماراسمها رسام..............تنكط مستحه ومن الخزر تجفل
وخطوط الحواجب تنثر سهام...........ببتوت الكلب تلعب وتجتل
عجز راهي بوصفها وعافها وكام......حرك كل القصايد والحجي يخجل
لجل حسنه نظل للدوم صيام............مانفطر لمن وجهه علينه يهل
يكليبي امشي عليك كل ايمام...........العشك عوفه تكتر لاولك بطل
ولك هذا العشك طيف وبعد مادام......لابد يوم منه تفز ولك وتمل
تظل سهران ليلك لاجفن نام...........يالعصفور ماتكوه عله زركة صل
يكلبي ولا تامن كل جرف هدام........واكعد بالشمس لمن يجيك الظل
............................................................الحميداوي
