سسسلآم عليكم
قصيـــدة أعجبتنــي جـــدآ للشاعــر: مشعــل بـن دهيـــّـــم .
يالله تعديها على خير وتصيب
من حدني أكتب خماله وعيبه
يبغى الصراحه ما بها شك أو ريب
بَاقولها والناس كل و طيبه
الحر ما ينفع بليّا مخاليب
والعقل للرجّال زينه وهيبه
والسالفة ما هي بلحية مواجيب
كل على طبعه يجيبه حليبه
بعض المنابت بالمراجل عذاريب
وبعض المنابت للمراجل خصيبه
رجل يبي طاريه عند الأشانيب
ورجل يبي طاريه عند الحبيبه
ورجل يودي بالسواليف ويجيب
ورجل سواليفه لفعله تجيبه
ورجل يغض الطرف عن جارة صحيب
ورجل عيونه فى محارم صحيبه
ورجل يغيب ويفقدونه هل الطيب
ورجل ليا من غاب ما حد دريبه
ورجل تشوف بخوّته لك مكاسيب
ورجل تشوف بخوّته لك غليبه
ورجل إذا أخطى يرى نفسه مصيب
ورجل إذا أخطى يراها مصيبه
قلت الصراحه ما بها شك أو ريب
كل على طبعه يجيبه حليبه
أشره وشرّه كان تبغى المواجيب
عط حق تاخذ حق ما به معيبه
