واحد بيقول :
النهاردة نزلت اجيب كشرى من المحل فلقيت صاحبه بيقولى انت جاى للمحل ولا عاوز تاكل كشرى وخلاص
انا استغربت قولتله عاوز اكل كشرى عادى هو مش انتوا بتوع كشرى ولا ايه
قالى لا مش قصدى اصل فى محل فاتح جديد بعدينا بشارع تقريبا وماحدش بيشترى منه بقاله كتير فممكن تشترى من هناك
قولتله يعنى انت مش عاوزنى اشترى من عندك !!!!
قالى مش قصدى بس هو ماحدش يعرفه ولسه فاتح و انا الحمد لله جالى رزق كويس النهاردة
قولتله طيب ماهو ربنا اللى بيوزع الرزق اكيد هيبعتله ؟؟!!
قالى ماانا عارف ونعم بالله بس احنا داخلين على عيد وكل سنه وانت طيب واكيد هو محتاج فلوس
قولتله طيب هروح اشترى منه
قالى بس ما تقولوش انى بعتك اشترى منه وقول لكل اللى تعرفهم عن المحل بتاعه
قولتله طيب مش خايف يكبر وياخد منك السوق !!!!!
قالى مش انت قولت ربنا بيوزع الرزق .......انا هساعدة فاكيد ربنا هيعدل بينا وهيساعدنى
قولتله انت ربنا يجازيك خير انا هشترى منك ومنه
عاوز علبه وهشترى منه علبه بردة
واشتريت ورحت المحل التانى ولقيته فاضى جدا والعمال قاعدين بيتكلموا مع بعض ومش بيعملوا اى حاجه دخلت وطلبت العلبه ولقيت بسمه رهيبه بدأت تترسم على وشهم
وكل واحدفيهم عاوز يعمل كل حاجه وكأنه ما صدق لاقى حاجه يعملها
قولتله انت فاتح بقالك كتير ؟
قالى بقالى فوق الشهر.... قولتله وبيجيلك زباين كويسه!!!!
قال..انا ربنا بيعبتلى رزق كل يوم واحد او اتنين بس انا واثق انها هتفرج دا ربك كريم
الموقف دا حسسنى معنى ان ربنا يسخرلك ناس تساعدك وانت ما تعرفش
يعنى ممكن تكون لوحدك ومافيش حد جمبك وحاسس أن الدنيا مقفله فى وشك
بس ربنا بيسخرلك واحد فى الوقت دا يخفف عنك وانت مش عارف
ربنا. رحيم اوى يا شباب بينا ...لدرجه لا تتخيلوها
ربنا بيسندك من غير اما تحس وكرمه فوق ما تتخيل
اذكر اسم من اسماء الله الحسنى بنية الفرج
