قصيدة للمبدع فهد المساعد لاتحرموا انفسكم
من متعت تذوق الشعر بها
يا رفيف الماء .. وفجر العيد .. وأحزان المواني
يا أكثر أهل الأرض طيبة قلب .. وأسرار دفينه
المكان اللي هنا .. مليان ضحكات ، وأغاني
والكلام اللي بغيت أقول .. يحتاج ل سكينه !
شوفي الركن البعيد هناك .. كنه صدر حاني
هذا هو اللي يليق ب شاعر و بنت حزينه!
أنسي الشارع ، وعتمات الزوايا ، والمباني
هاتي يدينك نلف الغيم و نشكل مدينه !!
عندي الليلة كلام و صمت .. وأخاف الثواني
تظلمه .. أو تظلم اللي فيه كم ضاعت سنينه
بس لازم تسمعين اللي أبي ولا تراني
لو ب أعيده لك .. نسيت .. ورحت أقول اللي تبينه
شي واحد قبل ما أبدأ .. ما أبي أي شي ثاني
يخطر ف بالك .. وأنا أكشف لك شعور تجهلينه !
إن أنا .. وبكل ما تحمله " أحبك " من معاني
كنت ، وراح أبقى أحبك .. لين .. مدري وش هو لينه !!
بس والله ماقدرت أنسى .. ولا همي نساني
لا ذكرت إنسان .. فيه أسرار مابينك وبينه
كل ما تطري علي فكرة هواك الأولاني
أشعر إني أنطعن مليون مره من يدينه!
أشعر إن عيونك .. الله ما خلقها إلا عشاني
كيف كانت تبتسم له؟!.. قولي إنك تخدعينه !!
