في الصورة
كلمات نادر الأسيوطي
طلبت بنتي الأمورة
أرسم رسمه صغيورة
ارسم مصر المنصورة
واتوصي كمان بالصورة
خدت قلمي وبديت
وبإسم الله سميت
سرحت شويه لقيت
دموع نازله مكسورة
بنتي لاحظت سرحاني
ورعشت إيدي وتوهاني
رجعت تتوسل تاني
ابدأ بيمين الصورة
ويمين الصورة حكاوي
وملاحم ساقها الراوي
غنوها الشعرا غناوي
لكن ناقصه الفزوره
بنتي نطت سألتني
فزورة إيه خضتني
قلت في نفسي يا رتني
لَعّيَت طلب السنيورة
لَحْت اتكلم دوغري
واصدق في كلامي وردي
قلتلها حدودنا يا بنتي
منهوبة فردي وبالتورة
عنيها وسعت م الخضة
وقع مصروفها الفضة
عملت إن انا حتوضه
أداري نفسي المقهورة
قالت طب خدها شِمَال
والوضع أكيد أهو عال
غني الألم الموال
علي الجارة المضرورة
قالت طب انزل حبه
للجارة السمرا الشابه
قلمي هرب يتخبه
وينسي الحته المبتورة
قالت طب اطلع فوق
يمكن يا حبيبي نفوق
قلمي م الغيظ مفلوق
علي حقوقنا المهدورة
قالت في القلب مكانا
ومحدش شاغل بالنا
بكت الصورة علي حالنا
وعلي العالم المسعورة
شالت الصورة بإيديها
ودموعها مليا عنيها
قالت ربي إحميها
وخليها ديما مستورة
كلمات نادر الأسيوطي
. 
