السلام عليكم ورحمة الله وبركاته
مساء الخير على الجميع
رائعه كـ روعة شاعرها :
________________________________
بديت اللحـون السامريـة وأنـا مبـداي
يراعـي تقالـيـد الـرجـال ومباديـهـا
وأنا لي ثلاث سنين كوعي علـى مركـاي
دروب المحـبـة معتزلـهـا ولا أبيـهـا
عن الجمة العذبة صدرت وطويت رشـاي
هناهـا عـذاب ويخلـف المـر حاليهـا
وحرب الهوى عيّدْت فيهـا علـى منجـاي
وقنّعـت منهـا قلبـي وبعـت شاريـهـا
لكن ليتني عصر الثلاثا ما سقت اخطـاي
على ديرة ٍ غنـّى لـها الشـوق قمريهـا
سحابة غرام ٍ هلّت الوبـل فـوق حمـاي
تدانـت وأنـا والله .. مـانـي بـ دانيـهـا
جرف سيلها قلبي وعوّدت فـي مضـواي
أهادي بساقـي سكّـة الـدرب وأخطيهـا
هنوف ٍ على القلب أوعزت وأيقظت ملهاي
ودكـّت حصـون الذكريـات ومبانيـهـا
بـ نجل العيون اللـي بهـا علتـي ودواي
وهايـف حشاهـا وإستواهـا ونابيـهـا
تذكـّرت يـوم إنهـا بالإقبـال والإقفـاي
تجـرّ المياسـم فـوق كبـدي وتكويهـا
بعدها المفارق علّتي والوصـل مشهـاي
ويا سنـّة العشـاق مـدري طواريـهـا
حدتني ذعاذيـع المحبـة علـى مسـراي
على دروب ٍ أولّها مـا يوصلـك تاليهـا
دوارس خبوت العشق جرد ٍ بعد ممشـاي
أجـوب بـ سهلهـا والمراقيـب أعدّيـهـا
الاحي حمام الورْق وأطرب لصوت النـاي
والأفراح عنـي لاهـب الوجـد حاديهـا
الامل في حياتي مثل ذكر الغريب الجاي
ولا جاء و جتني ضيقـة ٍ قمـت أناجيهـا
هقيت وبغيت ولا احتملت ووصلت أقصاي
وسابـق غرامـي حظّهـا قيـّد يديـهـا
أعـدّل وأبـدّل علـم و اردّ رأي بـ رأي
ولا تحـرق الملـة سـوى رجـل واطيهـا
فؤادي نصحتـه لا يشمـّت علـي عـداي
ولكـنّ مـن لــه عــادة ٍ .. ما يخلّيـهـا
