السلام عليكم ورحمة الله وبركاته
مساء الخير على الجميع
_______________________________
اطعن بحد العيون السود من قدّك ؟
إن كان لك دين خل العين تستافي
ماهو غريبٍ عليك ولا على ودّك
كثّرت فيّ الطعون ورحت متعافي
تاخذك الايام وتودّيك وتردّك
ويخونك الوقت وتعوّد على الوافي
محلّك القلب كان ان الغلا شدّك
من غفلة الشوق صح النوم ياغافي
اخر علومك يقولون الجفا حدّك
وشلون دلّيت درب الوصل ياجافي ؟
ياطول ركضي وراك وياكثر صدّك
ما كنّك اللي سلبت العقل ! يا كافي
هذي هي اوراق شعري تحتري ندّك
من غيبتك والدفاتر بِيض وعجافي
كانك على الشوفه اللي شفت من جدّك
يا كبر فرْحتك لو تدري عن الخافي
تأكد إن المشاعر ما تقف ضدّك
لا خانها البرد ترجي صوتك الدافي
لو راح بي جزر غيرك جابني مدّك
ولا هب طاريك بشراعي ومجدافي
تشوقني لا لبست من الوفا قدّك
مالي عذر عن وفاك وزينك الصافي
الليل قطعة سواد ولا كسا خدك
والشمس ماغيّرت من ليلك الضافي
