قلوب أحباب
للشاعره الإماراتيه : شيخه الجابري
| على باب الأمل واقف أدور للأمان اصحاب | وأداعب حزني الطاغي على معزوفة آلامي |
| واسامر خيبة احزاني ومتعة وقتي الكذاب | وأنضح من هموم الآه غنوة أجمل اوهامي |
| قضيت العمر في راحه وأثاري للزمان اتعاب | سكبت الدمع من قلبي وجوفي للفرح ظامي |
| وحيد الهم واسمالي قديمه والدروب اعتاب | وصبري من زمان الشح غادر سكة ايامي |
| أحاول من "زكاة الليل" أرتق للزمان ثياب | بعد ما عرت الدنيا ملامح حبنا السامي |
| حبيبي شوف وش سوى الزمان بلهفة الغياب | وشوف الشوق بعيوني حزين باكي ودامي |
| غريب الفرح ف عيوني تلاقي والقلوب اغراب | تنادي والألم ساهر يدندن لهفة انغامي |
| توله ع اللقا قلب تعود شوفت الأحباب | على بعض الطروق اللي تغازل جرحي العامي |
| على يا ليل يا دانه على يا هم يا شباب | تجمل شوف لي حل يبرد حرة عظامي |
| عسير الوقت والأيام والأشجان والأصحاب | شحيح النور يا دنيا شحيح ومركبي طامي |
| لك الله يا زمان الصبر ضايع والدليل غراب | دروبك غصب ترحل بك وصوتك ف الخلا هامي |
| دخيلك لا تخليني أفتح للشقا ابواب | ولا تختال في روحي تعبت .. وتعبت اقدامي |
| وهن عظمي وأنا أكابر ودمعي في عيوني شاب | وهاذي النار تتشاعل وجفني "مول" ما نامي |
| أنا اللي جبته لروحي أدري ما حسبت حساب | وثقت وما هقيت إن الليالي تقتل احلامي |
| أبصبر يمكن المولى يفرج كربة المصطاب | يعود الطير لاغصانه ويرجع مصدر الهامي |
| على الله تعود بهجتنا وتتلاقى قلوب أحباب | وتغمر دارنا البسمه بعد ما غابت اعوامي |
للشاعره الإماراتيه : شيخه الجابري
